Ilocano Essays :

Sardengan nakon!

Nadamag ko nga dakkel iti parikut iti biyag mo dita pagilian tayo
Maiparparagawag kano nga adda ka kano nga makikamkamalala
Classmate ta idi manipud elementary inggana high school.

Kinatungtong ka babaen ti teknolohiya nga text ken telepono
Wen kunam, umay ka ditoy abroad tapno lumimpiyo ti biyag mo ken ti pamilyam
Lumabas ti mano laeng nga Domingo, nakadanon ka ditoy ayan ko
Agbirok iti trabaho ti agawaem para ti aannak mo

Madanagan ni baket ko, ni Nanang ko ken kakabsat ko.
Agalwadak kano.
Ammok nga awan dakes na ti tumulong.
Naggiyan ka ti maysa nga kuwarto ti balay mi.
Impaam-ammo ka kadagiti kabbalay tayo nga naggapu ta ti pareho nga baranggay.

Pagam-ammuan, agsarwa-sarwa ka metten...
Masikog ka?
Nagdinna kayo sakbay ka immay ditoy? Haan nga ni lakay mo dayta ta nabayag kayon nga nagsina kenni lakay mo.
Apay? Kunak no kayat mo nga lumimpiyo ti biyag mo?
Limmabas manen iti adu nga Domingo, NATINNAG TI SIKOG MO!
Diyak ammo no inggagaram wenno aksidente. Sika laeng ti makaammo.
Doktor ti nangkuna nga nasken laeng nga raspaen da ka tapno haan nga maapektaran ti health mo.
Binantayan da ka idiyay hospital. Siyak ngamin iti nangguyod kenka ditoy.
Agyamanak ta makataros ni baket ko...uray no kayat nakon nga pang-uren!

Idi bumayag, nakabirok ka ti trabaho. Adda met inleppas mo nga kurso ket napintas met ti nastrekam nga trabaho. Adda sarili mon nga paggiyanan. Nakaisem kan nga kanayon.
Agyamanak.
Lumabas iti maysa nga tawen, no awisen ka nga mangan tayo ti restaurant, adu ti rason mo ket haan kan nga makaumay ti grupo ti barkada tayo.
Nadamag ko nga adda kano kakinkinnitam nga lalaki.
Asino? Kunam nga naginnam-ammo kayo laeng somewhere.
Impaam-ammom kaniyami no asino isuna.
Ayos met ti tungtungan ti panagam-ammo. Agduwa-duwa ti nakem ko ti makitkitak nga garaw yo.
Sinaludsod ko idiyay pagilian tayo no asino didiyay maiparparagawag nga kakamkamalalam idi...naammuwak ti agpayso.
Ginuyod mo isuna ditoy...ket agkadkaduwa kayo.
Langsot ka met gayam gayyem. Kunak no am-ammo ka. Haan gayam.

Nalawag nga naulaw ka iti ayat. Uray no haan nga umiso. Parehas kayo nga pamilyado.
Nakaisem kayo pay nga nanggamit ti kotsek. ULEG kayo iti biyag mi.

Haan dak nga as-asegan manen. Haan ka nga am-ammo. Bagim laeng ti panpanunotem..un-unaem kuma ti annak mo. Irasonam pay ti aramid mo??

Awan pakibiyangakon kenka. Uray aniya nga tulong ti sumangpet, sika met gayam ti mangar-aramid ti parikut ti biyag mo.

Lumabas iti duwa nga tawen, pinanawan kayo. Adda napinpintas nga opportunity para ti pamilyak idiyay dadduma nga ballasiw taaw.

Idi bumayag, adda metten annak yon. Aniya ngay ti apelyido da? Diyak kayat nga mangngeg. Addayo akon. Makaangesakon ti nauneg.

Ag-email ka pay la kaniyak? Paw-itan nak pay latta ti litrato ti uubbing nga biktima ti kinakurang ti panunot yo???
Ipadpadamag mo pay laeng nga naragsak ti biyag yo uray no adu ti parikut nga maipanggep ti gastos?

Kasano nga lumimpiyo ti biyag yo no kasta met ti panagpanpanunot yo? Tallo nga pamilya ti supsuportaan yo. Pamilyam idi, pamilya na idi ken dayta inaramid yo nga pamilya itatta.

Haan ta nga agbarkadan. Naragsaken ti biyag ko itatta nga adda family friends mi nga limpiyo nga tattao.

Kettabem ti prutas ti aramid mo. Diyak kayaten nga makibiyang ti biyag mo.

Aniya ti napasamak kenka? Sika amin ti gapu na.

Sayang, sika laeng kuma ti barkadak nga natulungak nga naggapu ti baranggay nga naggapuwak.

Pangaasim ta sardengan nakon. Diyak kayat nga makita ti kakaasi nga rupam wenno mabasa ti ulbod nga sursurat mo!

Agyamanak kenni baket ko ta atiddog ti pasensiya na.

Baket, no mabasam daytoy, haan mo la ammo no kasano nga palalo nga pimmudot ti panagayat ko kenka gapu kadagiti impakitam nga pasensiyam iti kinatangken met iti rasrason ko idi...ta kayat ko ngamin met kuma ti tumulong ti dadduma nga tao.
I love you very much baket.